ກົນລະຍຸດຮັກສາພະນັກງານ Top Talent
ໃນຍຸກທີ່ມີການແຂ່ງຂັນທາງທຸລະກິດມີຄວາມເຂັ້ມຂຸ້ນ ການຮັກສາພະນັງການງານທີ່ມີຄວາມສາມາດສູງ (Top Talent) ໃຫ້ຢູ່ກັບອົງກອນຢ່າງຢືນຢົງນັ້ນ ຖືເປັນໜື່ງໃນຄວາມທ້າທາຍທີ່ສຳຄັນສຳລັບຜູ້ຈ້າງງານ, ດ້ວຍເຫດນີ້ ການມີກົນລະຍຸດທີ່ຊັດເຈນ ແລະ ມີປະສິດທິພາບໃນການຮັກສາພະນັກງານ ຈຶ່ງເປັນສີ່ງທີ່ຈຳເປັນ ເພື່ອປ້ອງການການສູນເສຍບຸກຄະລາກອນທີ່ມີຄວາມສາມາດ ແລະ ສາມາດສ້າງຄວາມໄດ້ປຽບທາງທຸລະກິດໄດ້ໃນໄລຍະຍາວ:
1. ສ້າງວັດທະນະທຳອົງກອນໃຫ້ໜ້າສົນໃຈ
- ການສ້າງສະພາບແວດລ້ອມການເຮັດວຽກທີ່ສະໜັບສະໜູນຄວາມຄິດສ້າງສັນ, ການມີສ່ວນຮ່ວມ ແລະ ຄວາມເຄົາລົບເຊິ່ງກັນ ແລະ ກັນ. ຊ່ວຍໃຫ້ພະນັກງານຮູ້ສຶກເປັນສ່ວນໜື່ງຂອງອົງກອນ.
- ສົ່ງເສີມວັດທະນະທຳທີ່ເນັ້ນການຮຽນຮູ້ ແລະ ການພັດທະນາຕົນເອງເຊັ່ນ: ການສະໜັບສະໜູນການຝຶກອົບຮົມ ຫຼື ການໃຫ້ທຶນການສຶກສາສຳລັບພະນັກງານ.
2. ຈັດສະພາບແວດລ້ອມໃຫ້ມີໂອກາດໃນການພັດທະນາ ແລະ ເຕີບໂຕ
- ພະນັກງານທີ່ມີຄວາມສາມາດສູງມັກເບິ່ງຫາຄວາມກ້າວໜ້າທາງອາຊີບ ແລະ ຄວາມທ້າທາຍໃຫມ່ໆ. ດັ່ງນັ້ນ ການມອບໂອກາດໃນການພັດທະນາເຊັ່ນ: ການໝູນວຽນວຽກ (Job Rotation) ຫຼື ການມອບໝາຍງານທີ່ມີຄວາມຮັບຜິດຊອບສູງຂຶ້ນ ຈະຊ່ວຍຮັກສາຄວາມສົນໃຈຂອງພະນັກງານໄດ້.
- ຈັດໃຫ້ມີແຜນການພັດທະນາທັກສະສ່ວນບຸກຄົນ (Personal Development Plan) ທີ່ເໝາະສົມກັບແຕ່ລະບຸກຄົນ.
3. ໃຫ້ການຍອມຮັບ ແລະ ຍ້ອງຍໍຜົນງານຕາມຄວາມເໝາະສົມ
- ການສະແດງຄຳຂອບໃຈ ແລະ ຍ້ອງຍໍພະນັກງານທີ່ມີຜົນງານໂດດເດັ່ນ ບໍ່ວ່າຈະຜ່ານຄຳຍ້ອງຍໍ, ການມອບລາງວັນ ຫຼື ການເລື່ອນຕຳແໜ່ງ ເປັນສິ່ງທີ່ຊ່ວງສ້າງຄວາມເພິງພໍໃຈ ແລະ ກະຕຸ້ນແຮງຈູງໃຈ.
- ໃຊ້ລະບົບ Feedback ທີ່ເປີດກວ້າງ ແລະ ໂປ່ງໃສ ເພື່ອໃຫ້ພະນັກງານຮູ້ສຶກເຖິງການມີສ່ວນຮ່ວມໃນອົງກອນ.
4. ຈັດສັນຄ່າຕອບແທນ ແລະ ສະຫວັດດິການທີ່ເໝາະສົມ
- ຄ່າຕອບແທນທີ່ແຂ່ງຂັນໄດ້ ແລະ ສະຫວັດດິການທີ່ຕອບໂຈດຄວາມຕ້ອງການຂອງພະນັກງານເຊັ່ນ: ການເຮັດປະກັນສຸຂະພາບໃຫ້ກັບພະນັກງານ, ການລາວຽກທີ່ສາມາດຍືດຫຍຸ່ນໄດ້, ຫຼື ໂປຣແກຣມສະໜັບສະໜູນຄອບຄົວພະນັກງານ ມີບົດບາດສຳຄັນໃນການຮັກສາພະນັກງານທີ່ມີຄວາມສາມາດ
- ພິຈາລະນາປັບຄ່າຕອບແທນຕາມຜົນງານ (Performance-Based Pay) ເພື່ອສ້າງແຮງຈູງໃຈ.
5. ສະໜັບສະໜູນຄວາມສົມດຸນລະຫວ່າງວຽກງານ ແລະ ຊີວິດສ່ວນຕົວ
- ການມອບຄວາມຍືດຫຍຸ່ນໃນເລື່ອງເວລາການເຮັດວຽກ (Flexible working hours) ຫຼື ການເຮັດວຽກນອກຫ້ອງການ (Remote Work) ຊ່ວຍໃຫ້ພະນັກງານສາມາດຈັດການຊີວິດສ່ວນຕົວ ແລະ ວຽກໄດ້ຢ່າງລົງຕົວ.
- ສົ່ງເສີມກິດຈະກຳທີ່ຊ່ວຍຫຼຸດຄວາມຄຽດເຊັ່ນ ການຈັດກິດຈະກຳສຸຂະພາບ ຫຼື ວັນພັກພິເສດ
6. ສ້າງຄວາມສຳພັນທີ່ດີລະຫວ່າງຜູ້ບໍລິຫານ ແລະ ພະນັກງານ
- ຄວາມສຳພັນທີ່ດີ ແລະ ການສື່ສານທີ່ເປີດກວ້າງລະຫວ່າງຜູ້ບໍລິຫານ ແລະ ພະນັກງານມີສ່ວນສຳຄັນໃນການສ້າງຄວາມໄວ້ວາງໃຈ ແລະ ຄວາມຜູກພັນໃນອົງກອນ.
- ຈັດໃຫ້ມີການປະຊຸມແບບຕົວຕໍ່ເປັນປະຈຳ ເພື່ອຮັບຟັງຄວາມຄິດເຫັນ ແລະ ຂໍ້ສະເໜີແນະຈາກພະນັກງານ.
7. ວາງແຜນການສືບທອດຕຳແໜ່ງ (Succession Planing)
- ການກຽມແຜນສືບທອດຕຳແໜ່ງ ຊ່ວຍໃຫ້ພະນັກງານທີ່ມີຄວາມສາມາດ ສາມາດເບິ່ງເຫັນເສັ້ນທາງການເຕີບໂຕໃນອົງກອນ ແລະ ຫຼຸດຄວາມສ່ຽງທີ່ພະນັກງານຈະຍ້າຍໄປອົງກອນອື່ນ.
8. ຕິດຕາມ ແລະ ວິເຄາະຂໍ້ມູນການລາອອກຂອງພະນັກງານ
- ການເກັບຂໍ້ມູນ ແລະ ການວິເຄາະເຫດຜົນທີ່ພະນັກງານລາອອກ ຊ່ວຍໃຫ້ອົງກອນສາມາດປັບປຸງກົນລະຍຸດການຮັກສາພະນັກງານໄດ້ຢ່າງມີປະສິດທິພາບ.
ສະຫຼຸບລວມແລ້ວ ການຮັກສາພະນັກງານທີ່ມີຄວາມສາມາດສູງ ບໍ່ແມ່ນພຽງແຕ່ເປັນການໃຫ້ຄ່າຕອບແທນທີ່ດີ ແຕ່ຍັງລວມເຖິງການສ້າງຄວາມສຳພັນທີ່ດີ, ການພັດທະນາທັກສະ ແລະ ການສະໜັບສະໜູນຄວາມສົມດຸນໃນຊີວິດ. ການລົງທຶນໃນກົນລະຍຸດເຫຼົ່ານີ້ ບໍ່ພຽງຊ່ວຍໃຫ້ຫຼຸດອັດຕາການລາອອກ ແຕ່ຍັງຊ່ວຍເສີມສ້າງຄວາມສຳເລັດ ແລະ ຄວາມຢືນຢົງຂອງອົງກອນໄດ້ໃນໄລຍະຍາວ.